Araweelo News Network.
Hragyesa(ANN)-Xildhibaanada gollaha wakiillada Somaliland, ayaa saaka waajahay duufaan siyaasadeed, gacan ka hadal iyo goollaaftan hadheeyay fadhigii gollaha oo sababay in cutubyo ka tirsan ciidanka Boolisku guddaha u galaan. kaddibna rasaas u adeegsadaan.
Duufaanka siyaasadeed, ayaa saaxada xalay gil-gilay, kaddib markii xeerka furashada ururada siyaasada iyo axsaabta qaranka oo Madaxweynaha Somaliland usoo gudbiyay gollaha fadhigii shalay lagu soo qaaday.
Hase yeeshee muddanayaasha gollaha wakiillada, ayaa mooshin la xidhiidha xeerka isla fadhigii gollaha ee shalay u gudbiyay shirguddoonka, iyadoo mooshinka ujeeddadiisu ahayd in xeerka sidaa lagu sii daayo oo aannay golluhu isku fur-furin dooddiiisa, balse mooshinka ayaa la laalay, iyadoo loo cuskaday sababo sharci oo waafaqsan dastuurka iyo xeer-hoosaadka gollaha.
Arrintaa, ayaa mar keliya xalay ka istaadhmay saaxada siyaasada duufaano gil-gilay ra’ayal caamka bulshada, kaddib markii axsaabta mucaaradku si weyn xalay uga digeen xeerka gollaha la horgeeyay, waxayna xilli danbe oo habeenimadii ay warbaahinta la hadleen ku eeddeeyeen Madaxweynaha Jamhuuriyadda Muuse Biixi inuu gollaha usoo gdbiyay xeer ku mudda dhaafay oo aan sharci ahayn.
Subaxnimadii hore waxa gollaha kasoo xaadiray ku dhowaad dhawr iyo lixdan xildhibaan oo ka mid ah 82-ka muddane, balse waxa madasha hadheeyay sawaxan iyo buuq, kaddib markii ay gacanta isula tageen laba Xildhibaan oo isku maandhaafay xeerka loo soo gudbiyay gollaha.
Cutubyo ka tirsan Booliska Somaliland, ayaa guddaha u galay dhismaha Baarlamaanka, kuwaas oo abaaray dhinaca hoolka, iyagoo doonaya in xidhaan mid ka mid ah xildhibaanada gacanta isu qaaday, balse waxa si weyn uga horyimi arrintaa mudanayaasha, waxaana dhexmaray gacan ka hadal sii kiciyay xaaladda iyo tacshiirado rasaas ah, wallow aannay jirin wax ka dhaawac ah oo ka dhashay rasaasta.
Goor danbe, waxa xarunta Baarlamaanka soo gaadhay Taliyaha Ciidanka Booliska Somaliland Sareeye Gaas Maxamed Saqadhi Dubad, wuxuuna la kulmay shirguddoonka gollaha, waxaase arrintaa soo dhexgalay shirguddoonka gollaha guurtida oo ku guulaystay in ay labada xildhibaan ee dagaalku dhexmaray isu keenaan, isla markaana heshiisiiyaan.
Muuqaalka Xaaladda Dagaalka iyo sidii jawigu ahaa halkan ka Daawo.
Published by Araweelo News Network.
Fadlan la wadaag saaxiibadaa oo warbxinaha iyo wararka ay soo gudbiyaan shebekaddaha Araweelo News Network.
Follow us Twitter@Araweelonews
Facebook@AraweeloNews
instagram@araweelonews
By Arraale M Jama Freelance Journalist and Human Rights activist.
info@araweelonews.com