Araweelo News Network
Caasimadda Karachi waa magaalada ugu ballaadhan Pakistan, waxana maayirkan cusub doortay dad ka badan 20 milyan oo qof, isagoo waliba ku jira xabsiga, waxaannu ballan ku qaaday inuu jeelka dhexdiisa ka maamuli doono magaaladaas.
Mr. Akhtar oo hore u ahaa xildhibaan Golaha Sharci-dejinta ah, ayaa loo doortay inuu noqdo maayirka Karachi maalintii Arbacada ee toddobaadkii hore, isagoo ku jira jeelka dhexe ee magaaladaas oo uu ku xidhnaa muddo bil ka badan.
“Akhtar waxa la xidhay bishii July, isagoo lagu eedeeyey inuu caawinayey dablay hubaysan iyo dambiilayaal, siiyeyna hoy iyo dawo. Akhtar waxa kale oo lagu haystaa dambiyo ah inuu mudaharaado abaabulay May 2007 oo masiibo ka abuuray magaalada Karachi, haddii dambigaas lagu helo waxa laga yaabaa in aan sannado dhawr ah la sii dayn.” Sidaa waxa lagu yidhi warbixin lagu daabacay wargeyska Quartz oo Jamhuuriya soo xigtay.
Waxa ninkan maxbuuska ah ee Akhatar doortay xisbi siyaasadeedka MQM (Muttahida Qaumi Movement) oo tobannaankii sanno ee u dambeeyey maamulayey Karach. Waxa uu xisbigani leeyahay koox millateri, taasoo qayb ka ah in ninka ay doorteen ee Wasem xabsiga loo tacaabo.
Waxa uu maayirkan cusub sheegay inuu magaalada ugu qanisan dalka Pakistan ka xukumi doono qolka uu xabsiga kaga jiro, isagoo sheegay inuu xabsiga waydiisan doono in loo ogolaado inuu xafiis ka dhex furto si ay dadku u heli karaan adeegiisa, sida daabacday Wakaaladda Wararka ee Reuters oo wargeyska Jamhuuriya soo xigtay.
“Ma jiro hool shirar ah oo xabsiga dhexdiisa ah oo ku fulan in Golaha Degaanku ku kulmaan… waxa soo qabanqaabin doona habkaan uga qaybgalayo shirarka saraakiisa jeelka. Waxa aan ka shaki qabaa in maayirka cusub inuu ku-xigeenkiisa u igman doono inuu shirarka uga qaybgalo.” Sidaa waxa yidhi sarkaal sare oo ka tirsan dawladda Pakistan oo la hadlay wargeyska Financial Times.