Waxaa qoray: Aqoonyahan Jaamac Ibraahim Awad
Mudane Madaxweyne,
Annigoo ah Guddoomiyihii hore ee Daladda Naafada Somaliland, isla xilligana u dhaq-dhaqaaqa xuquuqda dadka naafada ah isla markaana Xubin ka ah Xisbi Xaakimka WADDANI.
Mudane Madaxweyne, waxaan kuu soo dirayaa warqadan furan si aan kuula wadaago rajooyinka iyo caqabadaha ay dadkayagu la kulmaan.
Doorashadaadii waxay dhalisay yididiilo iyo rajo cusub oo ku saabsan in wax laga qabto baahiyaha iyo xuquuqda bulshada naafada ah.
Dadka naafada ahi waxay qayb muhiim ah ka yihiin bulshada Somaliland, laakiin si joogto ah ayay ugu dhex jiraan caqabadaha la xiriira helitaanka adeegyada aasaasiga ah sida caafimaadka, waxbarashada, iyo shaqooyinka. Waxaa kale oo caqabad ku ah dhaqanka bulshada iyo fahamka gaaban ee ku aaddan xuquuqda naafada.
Waxyaabaha aan rajaynayno inay dawladdu wax ka qabato:
1. Sharciyeynta Xuquuqda Naafada: Sameynta iyo dhaqan-gelinta sharciyo dhowra xuquuqda dadka naafada ah.
2. Waxbarashada iyo Shaqada: Abuurista fursado waxbarasho iyo shaqo oo u gaar ah dadka naafada ah si ay bulshada ula mid noqdaan.
3. Helitaanka Adeegyada Aasaasiga ah: In dadka naafada ahi si sahlan ugu heli karaan caafimaad, gaadiid, iyo meelaha bulshada ay wadaagaan.
4. Wacyigelin: In bulshada loo sameeyo wacyigelin ku saabsan muhiimadda ay leedahay in dadka naafada ahi ka mid noqdaan horumarka dalka.
Mudane Madaxweyne, waxaan ku xasuusinayaa in horumarka Somaliland uusan dhamaystirmi doonin haddii bulshada naafada ahi aysan qayb ka noqon qorsheyaasha horumarinta. Waxaan rajaynaynaa inaad si dhow uga shaqayn doonto sidii loo hubin lahaa in aan si siman ugu wada faa’iidaysanno khayraadka iyo fursadaha dalkani leeyahay.
Mahadsanid,
Jaamac Ibraahim Awad Guddoomiyihii hore ee Dadka Naafada Somaliland
The views expressed in this article belong to the author and do not necessarily reflect the editorial policy of Araweelo News Network.