Araweelo News Network
Buug uu ku qallin-jebiyey arday shahaadada sare diyaariyey (PhD thesis) oo u dhashay waddanka Boqortooyada Sucuudi Carabiya, ayey siyaasad ka dhigatay xukuumadda galbeedka dalka Australia, gaar ahaan Waaxda Ilaalinta Seerayaasha iyo Duur-joogta si ay u ogaato sida degaanku u sameeyo xeebaha.
Waaxdan ayaa sheegtay in xog daraaseedka buuggan ku qoran ay fulin doonaan. Waxa buuggu si gaar ah u taabtay xaaladda xeebta woqooyi ee North Kimbery oo galbeedka Australia dhacda, halkaas oo hoos-u-dhac aad u weyn ku yimi duur-joog badan oo degaankaas ku noolaa.
Waaxda Ilaalinta Seerayaasha iyo Duur-joogta ee Australia, waxa ay xustay in daraasad ardaygan Sucuudiga ah oo la yidhaa Moataz Kurdi sameeyey oo ku qoran buuggiisa qallin-jabinta tahay tii ugu horreysay nooceeda, uguna saxsanayd, taasoo ay ku jiraan sawirro iyo xogo biyaha hoose badda oo muujinaya saamaynta ku timi xayawaanka iyo dhirta badda gudaheeda ku nool.
Waxa kaloo waaxdani sheegtay in daraasadaha noocan ah u oggolanayaan in la ilaaliyo degaanka badda, lana ogaado saamaynta cilmilada is-beddeshay ku yeelato.
Kurdi oo deeq waxbarasho oo shahaadda PhD ah ka helay dawladda Australia, waxna ka dhiganayey Jaamacadda Curtin University oo galbeedka dalkaas ku taal, waxa uu buuggiisa ka qoray saamaynta degaan ee xeebta North Kimberly, isagoo isticmalayey sawirro satalaydka uu ka helay (Geomorhology of North Kimberly Coast in Western Australia and Used remote sensing techniques and satellite images).
Daraasadda ardaygani waxa ay badka soo dhigtay hab-cilmiyeed cusub oo loo isticmaali karo macluumaad yaal dalalka horumaray.
Mr. Kurdi ayaa u sheegay warbaahinta Al-carabiya in daraasaddiisu ka qaybqaadanayso horumarinta xeebaha amma xeelliyada galbeedka Australia iyo waliba in beero laga qoto degaannada ku teedsan xeebahaas.