Araweelo News Network
Haweenay u dhalatay dalka Azerbaijan oo hore uga tirsanaan jiray Midowgii Soofiyeeti ee Ruushka, ayaa ku guulaysatay in ay biraha siliigga ku qorto far qurux badan oo Qur’aanka Kariimka ah.
Gabadhan oo la yidhaa Tunzale Memmedzade oo 23 jir ah, isla markaana ku takhasustay qurxinta iyo sawirrada gacanta lagu farsameeyo, waxa ay isticmaashay silig madaw oo 50 miir ah, iyadoo qallin ahaan u isticmaashay khad 15,000 (shan iyo toban kun) mililliters oo dahab iyo silfer isugu jira si ay Qur’aanka ugu dhammayso siligan. Muddo saddex sanno ah ayey ku qaadatay in ay hawshaas dhammayso.
Haweenaydani waxay ku dhiirratay inay Qur’aanka habkan farshaxannimada leh u qorto, waxaanay sheegtay in markii ay baadhitaan badan samaysay qur’aanka lagu qori karo waxyaabo kala duwan oo siliiggu ka mid yahay, taasina ay keentay in ay hawshan ku dhaqaaqdo.
Waxa kaloo ay ku dooday in aanay jebin shareecdda, maadaama ay Qur’aanka si farshaxannimo leh ugu qortay siliig bira, nadiif ah oo aan wasakh iyo nijaas u dhawaan karin.
Mss. Tunzale Memmedzade waxay wax ku baratay Jaamacadda Marmara ee dalka Turkiga, waxaanay Alle ugu mahadnaqday inay dhammaysay shaqo saddex sanno ay wadday, waqtigana farxad aad ah ay dareemayso, maadaama ay noqotay qofkii ugu horreeyey ee hawl noocan ah qabta.
