Araweelo_News_Network
Hargeysa(ANN)-Madaxweynaha Jamhuuriyadda Somaliland Cabdiraxmaan Maxamed Cabdilaahi (Cirro) ayaa kulan albaabada loo xidhay Qasriga Madaxtooyada kula yeeshay Hoggaanka sare ee Xisbiga Mucaaridka ah ee Kulmiye.
Lama ogga arrimaha dhabta ah ee lagaga hadlay kulankaa oo aannay saxaafadu goob joog ka ahayn. Hase yeeshee Afhayeenka Madaxweynaha Somaliland Xuseen Aadan Cige (Deyr), ayaa qoraal saxaafadeed kooban oo kulanka kaddib uu soo saaray, wuxuu ku sheegay in lagaga hadlay kulnaka arrimo muhiim ah oo la xidhiidha xaalada dalka ee Qaramaynta Ciidamada Medeniga ah oo xukuumaddu ku hawlantahay iyo sidoo kale, sidii Somaliland ugu sii socon lahayn dhabaha dimuqraadiyada iyo doorashooyinka.
Sida lagu sheegay War-saxaafadeedka Madaxtooyadda Kulanka oo ahaa mid ka yimi dhanka mucaaradka oo ay Madaxweynaha ka dalbadeen Hoggaanka Sare ee Kulmiye.
Madaxweynaha Jamhuuriyadda Somaliland Cabdiraxmaan Maxamed Cabdillaahi iyo Xukuumaddiisa ayaa aqbalay sida lagu sheegay war-saxaafadeedka, waxayna ku qaabileen Xisbiga Mucaaradka ah ee Kulmiye niyad-samaan, laab-furnaaan iyo hannaanka wada-shaqeynta Axsaabta Qaranka iyo Xukuumadda haatan talada haysa.
Kulanka ayaa lagaga wada hadlay isla markaana lagu gorfeeyey arrimo door ah oo mudnaan u leh Qarannimada Jamhuuriyadda Somaliland, waxaana lagu xusay war-saxaafadeedka in arrimaha lagu soo qaaday oo ay ka mid ahaayeen:
1. Ka wada shaqaynta amniga, xasiloonida iyo difaaca Qaranka,
2. Adkaynta midnimada iyo wadajirka bulshada Somaliland,
3. Qabyo-tirka iyo kobcinta hannaanka dimuqraadiyada iyo doorashooyinka dalka,
Hoggaanka sare ee Xisbiga Mucaaridka ah ee Kulmiye waxa ay Madaxweynaha la wadaageen talooyin guud oo la xidhiidha xaaladaha haatan taagan ee xagga amniga, siyaasadda, dhaqaalaha iyo arrimaha bulshada.
Dhankooda Hoggaanka sare ee Xisbiga Mucaaridka ah ee Kulmiye waxa ay Madaxweynaha ku bogaadiyeen Qaramaynta Ciidamada Madaniga ah iyo weliba tiro-koobka madax taabashada ah ee dhammaan Ciidamada kala duwan ee Qaranka.
Sida lagu xusay war-saxaafadeedka Madaxweynaha iyo hoggaanka Xisbiga Mucaaridka ah ee Kulmiye waxa ay hoosta ka xarriiqeen muhimadda ay leedahay in laga gudbo khilaafaadka siyaasadeed si loo helo Somaliland u midaysan horumarkeeda meelna uga soo wada jeestada cadawgeeda, isla markaana loo xoojin lahaa hannaanka dimuqraadiyada iyo baahida loo qabo hannaan doorasho oo hufan oo caddaalad ah, iyada oo la xoojinayo sharcinimada hay’adaha dalka ee dimuqraadiga ah.
Madaxweynaha Jamhuuriyadda Somaliland waxa uu Hoggaanka Xisbiga Mucaaridka ah ee Kulmiye mar kale u xaqiijiyey in albaabkiisu uu mar walba u furan yahay iyaga iyo Xisbiyada kale ee Qaranka ee Jamhuuriyadda Somaliland.
Dhinaca Xisbiga Mucaaradka ee KULMIYE, waxa ku matalayay kulanka Guddoomiyaha Xisbiga Mucaaradka ah ee Kulmiye, Maxamed Kahin Axmed, Guddoomiye Ku xigeenka 1aad Cabdicasiis Maxamed Samaale, Guddoomiye Kuxigeenka 2aad Axmed Cabdi Dheere, sida lagu sheegay war-saxaafadeedka Madaxtooyadda.
Written by Arraale M. Jama, a freelance journalist and human rights activist.
Araweelo News Network.
info@araweelonews.com