#Araweelo_News_Network.
Madaxweyne Recep Tayyip Erdogan oo ku jira loollan addag 14 May 2023, Image File Araweelo News Network
Ankara(ANN)- Codbixinta Doorashooyinka Turkiga ee maanta oo Axad ah May 14, 2023, ka qabsoomay guud ahaan dalka , ayaa ku soo dhammaaday si nabadgelyo ah, iyadoo laga dareemayo codbixinta in Madaxweyne Recep Tayyip Erdogan uu waajahay loollankii ugu adkaa, isagoo hoggaaminaya xisbiga Cadaaladda iyo Horumarka (Justice and Development Party )
Madaxweynaha dalka Turkiga Recep Tayyip Erdogan muddo ka baddan labaatan sannadood hoggaaminayay dalka Turkiga, wuxuu loolan adag kala kulmay Kemal Kilicdaroglu , kaas oo ah hoggaamiyaha mucaaradka Republican People’s Party (CHP).
Erdogan, wuxuu waajahayay loollankii siyaasadeed ee ugu weynaa labadii sano ee u danbeeyay muddadii uu xukunka hayay.
Ninka ay sida weyn ula loolamayaan waa Hogaamiyaha mucaaradka Kemal Kilicdaroglu, wallow ay jireen murrashaxiin isakaga hadhay doorashada, kaddib fadeexado soo baxay.
In ka badan 64 milyan oo qof ayaa xaq u leh inay u codeeyaan si ay u doortaan Madaxweyne iyo Baarlamaan muddo shan sano ah.
Natiijada ayaa la filayaa inay soo baxdo saacadaha soo socda, iyadoo doorashada Turkiga ay sannadkan ka duwantahay doorashooyinkii hore uga dhici jiray, taas oo ay ugu wacantahay eeddaymo ay mucaaardku ku sheegayeen in faragelin siyaasadeed oo ka imanay dalalka Maraykanka iyo Ruushka ay saamayn ku yeesheen doorashooyinka xilligan ee Turkiga, wallow ay beeniyeen dhinacyada lagu eeddeeayay faragelinta doorashooyinka.
.
Kemal Kilicdaroglu oo hoggaaminaya mucaaradka, wuxuu loollan addag kula jiray Madaxweyne Recep Tayyip Erdogan doorashooyinka 14 May 2023, Image File Araweelo News Network
Kemal Kilicdaroglu , waa hoggaamiyaha mucaaradka Republican People’s Party (CHP). Muddo 13 sannadood ah ayuu hoggaaminayay xisbiga, isagoo doorashadii Baarlamaanka kusoo biiray 2002, sidoo kale hoggaamiyaha mucaaradka ayaa muddaharaadyadii 2017 ee gilgilay Istanbul hoggaaminayay, kuwaas oo ugu baaqayay Erdogan iyo xukuumaddiisu inay is casilaan.
Siyaasiga kale, Muhharem Ince oo ah hoggaamiyaha Nationalist Homeland Party , oo uu sameeyay 2021, waa markii labaad ee uu la tartamo Erdogan.
Sidoo kale, Sinan Ogan ayaaa ka mid ah hoggaamiyayaasha kale ee murrashaxiinta doonaya inay la tartamaan Erdogan,balse wuxuu isakaga hadhay tartanka saacado ka hor cod bixinta, markii ay soo baxeen fadeexado lala xidhiidhiyay.
Maamulka ayaa dejinaya hannaan ammaan oo ballaaran oo loogu talagalay doorashada madaxweynaha iyo baarlamaanka ee 14 May ee Turkiga, waxaana lagu ammaanay mid ka mid ah codadka ugu muhiimsan taariikhda qaranka Turkiga.
Golaha Sare ee Doorashooyinka oo loo soo gaabiyo (YSK) – guddiga ugu sarreeya ee doorashada dalka , ayaa kormeeri doona hannaanka dimuqraadiga ah ee ballaadhan ilaa codadka ugu dambeeya la tiriyo oo la aqoonsanayo kuwa ku guuleystay.
Dooorashooyinka Baaralamaanka iyo Madaxweynaha, ayaa ah kuwa xammaasadaysan, iyadoo ololluhu uu gaadhay heerkii ugu sareeyay, codbixiyayaashuna ay isu diyaarinayaan inay doortaan madaxweynahooda xiga iyo baarlamaanka, “waxaanu jebinaynaa habka adag ee lagu xaqiijinayo doorashooyin xor iyo xalaal ah oo ka dhaca Turkiga.”waa dhawaaqyada ka imanya cod bixiyayaasha.
Sida laga soo xigtay Wasaaradda Arrimaha Guddaha ee Turkiga, maalinta doorashada, ku dhawaad 600,000 oo askari ayaa ka shaqayn doona guud ahaan 81 gobol, kuwaas masuuliyadoodu tahay inay sugaan ammaanka doorashada,tiradaa ayaa u qaybsan 326,387 askari oo booliis ah, 196,197 ciidanka lagu magcaabo (Gendarme), 7,000 oo ilaalada xeebaha ah, 58,658 ilaalada khaaska ah, iyo 17,209 oo iskood isu xilqaamay, kuwaas oo mutadawaciin ah.
Sidoo kale, waxa door weyn ka qaadanaya amaanka, shabakadda kamaraddaha ilaalinta ee ku rakiban goobaha istiraatiijiga ah, kuwaas oo isha ku hayn doona kuwa dhibaatooyin samayn kara, ama loo arko inay amaanka halis ku yihiin.
Si la mid ah doorashooyinkii hore, muuqaallada Kamaraddaha ilaallada iyo dhammaan xogta la xidhiidha amniga doorashada waxaa si toos ah loogula socon doonaa laguna falanqayn doonaa xarunta isku xidhka amniga doorashada ee Aggaasinka Guud ee Amniga, oo ah ciidanka Booliska rayidka qaranka ee xaruntiisu tahay Ankara.
Doorashadii ugu dambaysay ee qaranka, in ka badan 50 kun oo Kamaradood ayaa si aan kala joogsi lahayn loogala socday, iyadoo hay’addaha amaanku ka daawanayeen muuqaallada isgoysyada, meelaha muhiimka ah iyo waddooyinka ay dadku u isticmaalaan si ay u gaadhaan xarumaha codbixinta.
Mas’uuliyiinta xarumaha doorashooyinka iyo kuwa amaanka auaa shaqada billaaba xilli hore maalinta doorashada, sida ay sheegtay wasaaradda arrimaha guddaha, kuwaas oo sii wadi doona howlahooda ilaa inta laga soo gabagabaynayo tirinta codadka.
Waxa la mamnuucay dalka Turkiga maalinta doorashadda si amaanka loo ilaaliyo, iibinta iyo isticmaalka cabitaanka khamriga goobaha dadku isugu yimaadaan, taas oo ka bilaabmay maalinta doorashada laga bilaabo 6 subaxnimo ilaa saqda dhexe.
Sidoo kale, waxa la mamnuucay in Qof aan ka ahayn kuwa mas’uulka ka ah ilaalinta sharciga iyo kala dambeynta aan loo ogolayn in uu qaato hub, walxaha qarxa iyo dhammaan noocyada wax-goynta, daloolinta ama qalabka wax lagu duubo ee loo isticmaali karo hub ahaan.
Muwaadiniinta dhulgariirka ka dhacay dalka ku waayay kaadhadhkooda aqoonsiga, ayaa lagu wargeliyay inay codayn karaan aqoonsi la’aan, haddii ay haystaan dukumentiyo kale, sida kaadhka aqoonsiga ku meel gaadhka ah, baasaboorka, warqadda guurka, liisanka darawalnimada, dukumentiga adeegga ciidanka, aqoonsiga xirfadda ama aqoonsiga ciidan ee kaadhka
Wakiilo ka kala socda dhowr hay’addood oo caalami ah ayaa kormeeri doona doorashada bisha May ka dhici doonta casuumaad ay ka heleen dowladda Madaxweyne Recep Tayyip Erdogan, taas oo ah dhaqan dimuqraadi ah oo soo bilowday 2002.
Sida laga soo xigtay goobjoogayaasha caalamiga ah, dhammaan doorashooyinkii ka dhacay Turkiga tan iyo 2002, waxay ahaayeen kuwo hufan, xor ah, in baddana la majeertay, kuwaas oo ahaa kuwo cadaalad ah oo waafaqsan heerarka caalamiga ah.
Erdogan, ayaa saaxada siyaasadda kasoo galay Istanbul, isagoo 1994 ilaa 1998, ahaa Maayarka Istanbul.
2003 ilaa 2014, wuxuu ahaa ra’iisal wasaaraha Turkiga, waxa xusid muddan in 2017, markii loo beddelay dalka in Madaxweynuhu awoodda yeesho halkii uu markii hore ka ahaa nidaamka Parliamentarian, iyadoo wax-ka- bedel lagu sameeyay nidaamka uu qeexayo dastuurku, wuxuuna ku guulaysatay laba doorasho oo is xiggay.
Muddadii uu dalka hoggaaminayay Erdogan, wuxuu kasoo kiciyay gidaarka Faqriga iyo shaqo la’aanta, wuxuuna ku guulaystay horumar dhinaca dhaqaalaha, siyaasadda iyo Millateriga , taas oo sababtay in Turkigu xilligan noqdo awood mar kale kusoo laabtay aduunka oo la dhegaysto. Laakiin mucaaradka ayaa ku dhaliilaya in Erdogan uu dalka ka dhigtay laambad isaga u shidan.
waxyaabaha ugu waaweyn ee lagu dhaliilayo waxa ka mid ah qaabka ay xukuumaddiisu uga falcelisay dhulgariirkii khasaaraha baddan dhaliyay, balse iyadoo ay jiraan dhaliilaha kuwa kasoo horjeeda, weli wuxuu u muuqdaa Recep Tayyip Erdogan, inuu yahy hoggaamiye aan la loodin karin , waxaana la saadaalinayaa inuu si xaraggo ah ugu guulaysanayo doorashadooyinka maalinta Axadda ee 14 May 2023.
Please share with your friends the news and information provided by Araweelo News Network.
Follow us on Twitter@Araweelonews
Follow us and Like on Facebook@AraweeloNews
Follow us on /instagram@araweelonews
Follow us on TikTok / Tiktok.com/@araweelonews
Follow us on /araweelonews.tumblr.com
https://mursaljamasspace.quora.com/
YouTube channel for more videos: https://www.youtube.com/c/AraweeloTv
www.araweelonews.com
www.araweelonews.net
www.araweelonews.com/archi/
By Arraale M Jama Freelance Journalist and Human Rights activist.
info@araweelonews.com