#Somaliland: Madaxweyne Biixi Oo Albaabada Ka Furay Maxaabiis Ku Dhow Afar Boqol

#Araweelo_News_Network.

CAFIS-MADAXWEYNE

Hargeysa(ANN)-Madaxweynaha Jamhuuriyadda Somaliland,  Muuse Biixi Cabdi waxa uu wareegto Madaxweyne oo summadeedu tahay JSL/XM/WM/222-1144/012024, ee ku taariikhaysan 08/1/2024, Cafis Guud ugu fidiyay Maxaabiista dembiyada fudud ku xukuman ee xabsiyada dalka ku xidhan.

Sidaana, waxa lagu sheegay Qoraal wareegtada Madaxweynaha ee kasoo baxday Madaxtooyadda Somaliland,waxayna u dhignayd Sidan:-

Markaan Arkay: Qodobka 90^aad Faqraddiisa 5^aad ee Dastuurka Jamhuuriyadda Somaliland;

Markaan Arkay: Qoraalka Taliska Guud ee Ciidanka Asluubta ee summaddiisu tahay TCA/G-1/09/2024, kuna taariikhaysan 07/01/2024, ujeeddadiisuna tahay Soo-gudbin Liisaska Maxaabiista Cafiska galaya Sannadkan 2024-ka;

Markaan Arkay: Soo-jeedinta Xafiiska Xeer Ilaaliyaha Guud ee Qaranka ee summaddiisu tahay XIG/JSL/02/2024, kuna taariikhaysan 07/01/2024;

Markaan La-tashaday: Hay’addaha Ay Khusayso;

Waxaan Go’aamiyey;

In laga bilaabo taariikhda maanta aan Cafis Guud u fidiyo maxaabiista dembiyada fudud ku xukuman ee Xabsiyada Dalka ku xidhan,  oo tiradoodu dhan tahay  376 (Saddex Boqol, Lix iyo Todobaatan) maxbuus. Cafiskani saamayn kuma laha xuquuqda madaniga ah iyo raadka ciqaabeed ee ka-dhalanaya dembiyada ay ku xukunnaayeen. Waxa cafiskan fulinaya Xafiiska Xeer Ilaaliyaha Guud ee Qaranka, iyada oo la raacayo liiska Maxaabiista.

ALLAA MAHAD LEH

Muuse Biixi Cabdi

Madaxweynaha Jamhuuriyadda Somaliland