Araweelo News Network.
Hargeysa(NN)-Shirkadda Telesom ee ugu weyn Isgaadhsiinta casriga ee Somaliland, ayaa ka hadashay hakad ku yimi qadar kooban qaybo ka mid ah adeegyada ay bixiso Khamiistii, balse lagu guulaystay xalinta ciladdaa, isla markaana si caadi ah Bulshadu u isticmaalaysay.
Ciladda ayaa saamayn ku yeelatay Adeegga Lacagaha laysugu diro ama wax lagu kala iibsado ee Zaad iyo Telefoonada oo ay inta baddan bulshadu bulshadu istcimaasho adeegyada ay bixiso shirkadda Telesom oo ah shirkadda ugu ballaadhan dhinaca adeegga Isgaadhsiinta Somaliland,
Hase yeeshee adeegyada ayaa caadi kusoo noqday fiidnimadii, waxayna Maamulka Shirkadda Telesom oo ka hadlay bulshada ka siiyeen raalligelin cilladda ku timi qaybo ka mid ah adeegyada ay bulshada u hayso, iyagoo bulshada u ballanqaaday inay sida ugu dhakhsaha badan ku xallinayaan cilladda jirta.
Maareeyaha Guud ee shirkadda Telesom Keyse Maxamuud Faarax, Maareeye ku-xigeenka Guud ee shirkadda Faarax Maxamed Guure iyo Madaxa Waaxda Xidhiidhka Dadweynaha ee shirkadda Cabdiwahaab Maxamed Xuseen, ayaa bulshada la wadaagay raaligelintaa.
“Waxaanu ka raali galineynaa dhammaan macaamiishayada sharafta leh hakadkii ku yimid isticmaalka adeegyada Telesom. Waxaanu ku guddo jirnaa xalintii iyo cilad saaridii, waxaanu iidiin balanqaadeynaa in aanu wakhti kooban ku xalinayno ciladda dhacday,” ayay ku yidhaahdeen farriin qoraal kooban ah oo lagu baahiyay ciwaannada ay shirkaddu ku leedahay Baraha bulshada.
Dhinaca kale, gooor sii horaysay Wasaaradda Isgaadshiinta iyo Tignoolajiyada Somaliland oo ka hadashay arrintaa ugu baaqday dadweynaha in la sameeyo dulqaad inta la xalinayo ciladda.
Qoraal kooban oo ay wasaaraddu ku baahisay booggeeda Facebook, waxa ay sheegtay inay arrintan kala hadleen maamulka shirkadda Telesom, isla markaana xidhiidhka ay la sameeyeen wasaarad ahaan ay shirkaddu u xaqiijisay inay gacanta ku hayaan xalinta ciladda.
“Wasaaradda Isgaadhsiinta iyo Tignoolajiyaddu waxa ay xidhiidh kala samaysay maamulka shirkadda Telesom, isla markii ay ciladdu ku timi qayb ka mid ah adeegyada ay bixiso. Maamulka shirkaddu waxana noo xaqiijiyeen inay xallinteeda gacanta ku hayaan, muddo koobanna ay ku dhammaystiri doonaan. Sidaa awgeed waa in la sugo inta shirkaddu xalinay, ayay lagu yidhi farriinta qoraalka ah ee wasaaradda.
Published by Araweelo News Network.
Fadlan la wadaag saaxiibadaa oo warbxinaha iyo wararka ay soo gudbiyaan shebekaddaha Araweelo News Network.
Follow us Twitter@Araweelonews
Facebook@AraweeloNews
instagram@araweelonews
By Arraale M Jama Freelance Journalist and Human Rights activist.
info@araweelonews.com