Somaliland: Wasiirkii Hore Ee Maaliyadda Oo Ku Baaqay In Sharciga La Mariyo Afar Kooxood Oo Khiyaamo Ku Kacay

Araweelo News Network.

Hargeysa(ANN)-Yuusuf Maxamed Cabdi Raage oo ahaa Wasiirkii u horreeyay ee Madaxweyne Biixi 2017, u magcaabay Wasaaradda Horumarinta Maaliyadda Somaliland, ayaa ku baaq in hay’addaha sharciga ee dalku tallaabo ka qaadaan Afar kooxood oo sida uu sheegay khiyaamo qaran ku kacay.

Yuusuf Maxamed Cabdi, wuxuu sidaa ku sheegay  ayaa qoraal uu warbaahinta qaarkeed la wadaagay oo uu  ku soo bandhigay cadaawadda iyo wuxuu ku tilmaamay dagaalka Soomaaliya kula jirto Jamhuuriyadda Somaliland,

Sidaa awgeed wuxuu ka digay in kooxahaa ka qaybgalay doorashadii Soomaaliya ee qarsoodiga ahayd la mariyo waajibaadka sharci iyo qaanuunka u yaal dalka Jamhuuriyadda Somaliland, maadaama ay khiyaamo cad ka galeen dalka.

Qoraalka ayuu ku bilaabay sidan:-

“Sida aynu kala socono warbaahinta kale duwan ee ka hawl gasha dalka aynu jaarka nahay ee Soomaaliya, waxay ku hawlan yihiin doorasho ku sheeg la soo dhoodhoobay oo ay ku andacoonayaan inay ku metelaan dhulka iyo dadka Jamhuuriyadda Somaliland. Taas oo ah mid gef ah, been abuur iyo meel ku dhaca ku ah shacab-weynha, iyo qaranka JSL oo iyagu si xor iyo xalaal ah u doortay Golaha Wakiiladda ee qarankani leeyahay oo Maantana uu Gudoomiye ka yahay Mudane, Gudoomiye C/risaaq Khaliif Axmed.

Haddaba, Waxaan fariin xanbaarsan Warka ah Arrintan ah ka been sheegida , la wadaago, kuna baraarujiyo Xukuumada iyo Bulshada Reer Somaliland Guddo iyo Dibedaba in Dawladda ku sheega Aduunku ku siiyo masaariifta Villa Soomaaliya ay sii laban laabeen cadaawadoodii ay u hayeen shacabka iyo Qaranka JSL, oo ay maanta marayaan in Xulasho ku sheeg loo eekeysiiyay looguna yeedhay doorasho; balse aan ahayn doorasho aan laguna metelina sineba Bulshadda Reer Somaliland. Sida aduunka oo dhami ay ogaayeena kana markhaati kaceen in Umadda Reer Somaliland galeen doorasho is-barkan oo u dhacday si daahfuran oo ayna ku tilmaameen kagana warbixiyeen gaar ahaan Jimciyadda Quruumaha ka Dhaxaysa “UN REPORT“, iyo Goobjoogayaashii indhahooda ku arkay ee ka kala yimi daafaha aduunka oo dhan in Doorashadii JSL ahayd mid u dhacday si xor, xalaal, iyo sharaf ah  gayiga Somaliland oo dhan ( Free, Fair, and Credible Election).

Sidaa darteed, waxaan fariin iyo baaq wada socda u dirayaa Baarlamaanka Somaliland ( Golaha Guurtida, & Golaha Wakiilada), Wasaaradda Arrimaha Gudaha, Wasaaradda Arrimaha Dibeda, Sirdoonka Qaranka, Komishanka Doorashooyinka ee JSL, iyo Golaha Salaadiinta, Boqorada, Garaadada, iyo Cuqaasha Somaliland in talaabo adag laga qaado kooxda ku dhaqaaqday khiyaamo qaran oo cid kastabaa ka gudato wajiibkeeda kaga aadan isla markaana dabarkii iyo xeerkii wax fudadaynayna si dakhso ah loo bedelo. Afarta kooxoodna si dakhso ah wax looga qabto kuwaas oo kale ah sidan hoos ku xusan:-

Kooxda leh waxaanu nahay komishan doorasho oo metela Somaliland.

Xubnihii AFKA IYO Wajiga Duubtay ee yidhi waxaanu nahay Salaadiin, boqoro, Garaado, iyo Cuqaal ee dhaqankii umadani lahayd ka been sheegay.

Xubnihii u soo banbaxay Xulashadan, ee iyagu lahaa waxaanu u tartamaynaa aqalka sare, kii helay iyo kii laga helayba.

Siyaasiyiinta abaabulayay hawshan ee horena u lahaa waxaanu metelnaa JSL.

Waxaan kale oo talo u soo jeedinayaa Dawladdaha lacagta ku bixinaya xulashadan sida indho la’aanta ah uga socota Xamar, iyo xafiiska iyo ergayga u ah u qaabilsinaha QM  “UN ESPECIAL ENVOY FOR SOMALIALND AND SOMALIA” Somaliland & Somalia  in ay ka waantoobaan faro-gelinta aan dharka loo xidhin ee lagu hayo shacab iyo dawladdan JSL ee tashaday ahna Dal Gaar ah oo ay dhan yihiin dhamaan shuruuduhihii dal madaxbaani lahaa “Independent Sovereign State”, oo sanadka soo socdan gali doonaa haddii allaah idmo doorashooyinkoodii u qorshaysnaa, oo  Shacabka, Axsaabta Qaranka oo isku duuban ka qaran ahaan ku loolami doonaan. Cidii kale ee horumarka iyo dimuqraadiyaddan mucjisadaha ah ee ka hirgashay JSL Sii gaamurinteedan wax nagala qabatana waanu u mahad naqaynaa una hayn doonaa abaalkaas.

Waxaan ku soo afmeerayaa Maansadii Abwaan, Mujaahid. Hadraawi lahaa ee Sirta Nolosha beytat ka mid ah:-

Garashadu Sahraay Ruuxa
Sed u Gaara Weeyaane
Haduu Saamigaas  Yeeshay
Qurux ma leh Saluuggeedu
Dadku Siiga Dida Maaha
Sogob iyo Ri’Weyn Maaha
Sumal iyo Laxdiis Maaha
Rati iyo Sabeen Maaha
Falka  iyo Sugnaantiisa
Socodkiyo Abbaartiisa
Dhaqan Sida Xishoodkiisa
Dabar iyo Silsilad haysa
Iyo Suun Ma Dhaafaan ah
Wuxuu Soofka Xoolaaba
kaga Soocan Yahay Weeye
Waxaan uga Socda Heedhe
Naftu Seeto Yey Waayin.

Ninku Qaday Sahraay Tiisa
Hadduu Seed Liqliqiddeeda
Ku Saruurad Goyn Waayo
Subag iyo Baruur Doono
Siduu Jecelyahaa Been ah.

Ra’yiga lagu soo bandhigay maqaalkan wuxuu ka turjumayaa aragtida qoraaga, mana aha mid ka turjumaya siyaasadda tifaftirka, ama Faallada Araweelo News Network.

Guul, Nabad, Horrumar, Waddajir iyo Gobonimo

Allah Mahad leh.

Yuusuf Maxamed Cabdi Raage

Wasiirkii hore ee Wasaaradda Horumarinta Maaliyadda.