Berbera(ANN)-Cabashooyin, ayaa ka imanaya qaabka ay u socdaan Badeecadaha kasoo dega Dekedda Magaalada Berbera, kadib markii ganacsatada badeecadaha kala soo dega marsada magaalada Berbera ay soo waajaheen gaadidka badeecadaha u sida ee kusoo xidhanaya Dekedda dib u dhac.
Arrintan, ayaa ka dhalatay sida ay sheegayaan wararku kadib markii Maraakiibta soo gasha Marsada ee badeecadaha sida ay Ciidamada Badda Somaliland kusoo rogeen baadhis ka hor inta aanay kusoo xidhan Marsada, taas oo maamulka Dekedda ay isku khilaafeen, isla markaana saamayn ku ku yeelatay in gaadiidka badeecaddaha sida laga dejiyo badeecaddaha, iyadoo ganacsatada qaarkood sheegayaan in ay doonayaan in ay fursada Ciidka badeecaddaha socod siiyaan, isla maraakana ay arrintan dib u dhac ku keentay.
Maareeyaha Dekeda Berbera oo aanu la xidhiidhnay si aanu cabashada arrintan iyo saamaynta ay ku yeelatay hawlihii adeega dekdda wax uga weydiino, isla markaana fariimo uga dirnay Telefankiisa gancta, ayaanay noo suurta gelin inaanu wax jawaab ah ka helo.
Dhinaca kale, wararka ayaa sheegaya in muranka ka dhashay arrintan uu Taliyaha Ciidanka Ilaalada Xeebaha Somaliland Sareeye Guuto, Maxamed Xuseen faarax (Xiirane) u tegey Magalada Berbera, balse Taliye Xiirane oo aanu sidoo kale khadka Telefoonka kula xidhiidhnay si aanu wax uga weydiino khilaafka ka dhashay hawsha baadhista ee Ciidankiisu wado ayaanay noo suurta egelin.
Ganacsatada Badeecadaha kala soo dega Dekedda Berbera, ayaa marar baddan ka cawday tan iyo markii Dekedda Berbera lagu warejiyay shirkadda Dp, World oo ay wada jir u maamulaan dekedda shirkadda DP. World iyo xukuumadda Somaliland, balse arrintan ayaa ah mid aan xidhiidh la lahayn cabashooyinkaa hore, iyadoo wararku sheegayaan in shirkadda Dp. World saluug ka muujisay hawsha baadhista ee ay maraakiibta kusoo xidhanay dekedda ku bilaabeen ciidamadda Ilaalada Xeebaha Somaliland.