Araweelo News Network
Muqdisho(ANN)-Wasiirka gargaarka iyo maaraynta musiibooyinka dawladda Federaalka ah ee Soomaaliya Maryan Qaasim Axmed ayaa maanta sheegtay in ay iska casishay xilkii wasiirnimada ee ay ka haysay golaha wasiiradda Ra’iisal Wasaare Xassan Cali Kheyre.
Wasiir Maryan ayaa is casilaadeeda ku baahisay barta ay ku leedahay Twitter-ka, balse wali xafiiska Ra’iisal Wasaaraha ayaan wax hadal ah kasoo saarin arrintaas.
Hase yeeshee Wasiiradda oo la hadashay taleefishinka Goobjoog ee fadhigiisu yahay Muqdisho, ayaa faahfaahin ka bixisay sababta ay isu casishay, waxayna tidhi “Waxaan rabaa in aan idiin xaqiijiyo in aan iska casilay xilkii wasiirnimada, aniga oo illaahay uga baryaya xukuumada in booskeyga qof aniga iga wanaagsan uu u buuxiyo , hadda waxaan uga tagay xilkii aan hayay , waxaa igu adkaatay duruufta shaqo, wasaarad sida looga shaqeeyo ayaan aqaanaa, laakiin shaqada marka ay is barbar yaac tahay, wax walbo isku qasanyihiin , waxbo kala baxsanayn, wareer badan ayaa laga qaadayaa,”.
Maryan Qaasim, waxay intaas ku dartay in aanay xukuumadda mucaarad ku ahayn, iyada oo sheegtay in ay go’aansatay in ay siyaasadda faraha kala baxdo, bulshadana ugu adeegto sidii kale oo suurtogal ah.
Waa wasiirkii labaad oo xilka iska casila muddo 2 bilood gudahood ah, waxaana horay isu casilay wasiirkii gaashaandhigga kaas oo aan illaa hadda xilkiisii cidna loo magcaabin.
Ra’iisal wasaare Xassan Cali Kheyre, ayaa xiliga is casilaadda ay ku dhawaaqday wasiiradda kusii wajahnaa magaalada Baraawe ee gobolka Shabeelada Hoose, halkaas oo ay tahay markii ugu horeysay oo uu tagayo tan iyo intii xilka loo magacaabay.