Araweelo News Network
Madaxweyne Axmed Siilaanyo
Hargeysa (ANN)- Digreeto ka soo baxday xafiiska Madaxweynaha Jamhuuriyadda Somaliland, ayaa lagu shaaciyey in xuska maalinta dhagax-tuurka ee 20-ka February loo aqoonsaday maalinta dhallinyarada qaranka.
Sida lagu sheegay warsaxaafadeed uu ku saxeexan yahay Afhayeenka Madaxtooyada Somaliland, Madaxweyne Siilaanyo, ayaa meel-mariyey in sannad kasta noqoto maalinta dhallinyarada dalka 20-ka February oo ku beegan Isniinta berri, haddii Alle yidhaah.
“Madaxweynaha Jamhuuriyadda Somaliland Md. Axmed Maxamed Silaanyo waxa digreeto Madaxweyne oo summaddeedu tahay JSL/M/XERM/249-4570/022017 uu ku meel-mariyey in maalinta 20-ka bisha February ee sannad walba loo asteeyey in ay ahaato maalinta Dhallinyarada Qaranka Jamhuuriyadda Somaliland.
Madaxweynuhu:
Markuu arkay: Qodobka 90aad ee Dastuurka Jamhuuriyadda Somaliland;
Markuu tixgeliyey: Codsiga Wasaaradda Dhallinyarada iyo Ciyaaraha ee summaddiisu tahay WDHC/01/08/17, kuna taariikhaysan 16/02/2017, ujeeddadiisuna tahay codsi magacaabid maalinta dhallinyarada Somaliland;
Markuu qiimeeyey: Ahmiyadda dhallinyaradu u leeyihiin qaranka Jamhuuriyadda Somaliland, isla markaana ay muhiim tahay in la dhiirrigaliyo;
Wuxuu go’aansaday;
• In maalinta 20-ka bisha February ee sannad walba loo asteeyey in ay ahaato maalinta Dhallinyarada Qaranka Jamhuuriyadda Somaliland.
• In Wasaaradda Dhallinyarada iyo Ciyaaruhu hirgeliso xuska maalintaas sannadlaha ah, iyada oo kaashanaysa hay’addaha ku shaqada leh arrimaha dhallinyarada,” ayaa lagu yidhi warsaxaafadeedka Madaxtooyada.
20-ka bisha February oo hore loogu xusi jiray maalinta dhagax-tuurkii ardayda iyo dhallinyarada reer Somaliland, gaar ahaan kuwa caasimadda Hargeysa kala hortageen taliskii xasuuqa ee Siyaad Barre sannadkii 1982-kii.