Araweelo News Network
Ambassador. Berhe Tesfay
Hargeysa(ANN)- Brig Gen Ambassador. Berhe Tesfay oo ah Safiirka dawladda Ethiopia u fadhiya Somaliland ayaa shaaca ka qaaday inay Somaliland leedahay go’aanka bixinta saldhiga Millateri ee ay dalkeeda ka siisay Imaaraadka.
Wuxuu sheegay in aanu ahayn mid khuseeya Ethiopia, Saldhiga ay Somaliland bixisay ee Millateri, sidaa awgeed ay yihiin cadowga Somaliland iyo Ethiopia, dadka faafiyey in safaaradooda Hargeysa la xidhay, wuxuuna sheegay in aanay waxba ka jirin wararka sheegaya in xafiikooda Hargeysa la xidhay, isagoo si cad u sheegay inuu furnaan doono weligii.
Ambassador. Berhe oo Weriye Maxamuud Walaaleye oo ka tirsan wargeyska DAWAN, wax ka weydiiyey warar suuqa lasoo geliyay oo lagu sheegay in safaarada Ethiopia la xidhay, ka dib ansixintii heshiis loogu ogolaanayo saldhiga Imaaraadka ku yeesho Somaliland.
“Wararkaasi waxba kama jiraan, waana wararka beenta ah ee ay faafiyaan kuwa cadowga Ethiopia iyo Somaliland. Xafiiska Ethiopia wuu furnaan doonaa weligii.” Ayuu ku jawaabay Ambassador Berhe.
Mar la weydiiyey mowqifka xukuumadiisa ee saldhiga Imaaraadku ku yeelanayo Somaliland, wuxuu yidhi, “Arrinkaa Saldhiga go’aankiisa waxa leh Xukuumadda Somaliland, mana khuseeyo Ethiopia. Muhiimada isticmaalka dekeda Berbera ee Ethiopia waa inaan amaan ku helo, taasina waa waajib saaran Xukuumadda Somaliland.”ayuu raaciyay hadalkiisa Ambassador Berhe Tesfay.
Hadalka Amb. Berhe Tesfay ayaa meesha ka saaray hadalo laysla dhexmarayey oo xisbiyada mucaaradka qaarkood ku sheegeen in xukuumada Ethiopia ka soo horjeedo Saldhiga Millateri ee Xukuumadda Somaliland dalkeeda uga ogolaatay Imaaraadka Carabta.