Araweelo News Network
Washington(ANN)-Madaxweynaha dalka Maraykanka ee xilkiisu sii dhammaanayo Mr. Barack Obama, ayaa shaaciyey maalintii ugu adkayd ee soo martay muddo 8 sannadood ah oo uu dalkaas oo hoggaaminayey.
Obama oo Aqalka Cad taladiisa wareejin doona 20 January 2017, waxa uu sheegay mar lagu waraysanayey barnaamij taxane ah oo lagu soo bandhigay raadadka uu ka tegay (His legacies) in maalintii ugu adkayd ee soo marta intii uu Madaxweynaha Maraykanka ahaa ahayd 2012 mar uu la kulmay waalidiinta ubad lagu xasuusay dugsiga hoose oo lagu magacaabo Sandy Hook Elementary School .
“Waxa aan wali u aqoonsanahay maalintii aan u safray magaalada Newton si aan ula kulmo waalidiinta, bulshadaasna ula hadlo in ahayd maalintii ugu adkayd intii aan Madaxweynaha ahaa. Waa markii iigu horraysay ee aan waligay arko ciidanka sirdoonka oo ilmaynaya intii dhacdadu socotay. Waxay ahayd wax aad u argagax leh,” ayuu ku yidhi Obama waraysi dhowaan laga qaaday oo si rasmi ah loo sii dayn doono Janaury 15, 2017.
Maalintaas oo 20 carruur ah dhinteen iyo 6 kale waxa Obama laftiisa ka socotay ilmo, isagoo waliba dadka Maraykanka la hadlayey ayuu si toos ah u ooyey, dhammaan dadkii daawanaayeyna ay la wada ilmeeyeen.
Sidoo kale, horraantii January ee sannadkii hore wuu ooyey Brack Obama mar uu ku dhawaqaayey go’aan maamulkiisu dib-u-eegis ugu sameeyey haysashada hubka fudud ee dadlkiisa.
“Mar kasta oon xasuusto carruurtaas waan ooyaa oo waalli baan ku dhawaada,” ayuu Obama yidhi January 5, 2016.
“May ahayn oo kaliya waalidiinta, waad leedahay walaalo, waad og tahay, waa 10 jir, 8 jir iyo 3 jir cidda ay dhacdadaas ku dhacday, xataa ma fahamsana in walaalahood amma walaashood aanay dib guriga ugu soo noqonayn,” ayuu markale ku yidhi waraysi uu siiyey weriye lagu magacaabo Anderson Cooper oo ka tirsan telefishanka CNN.