Araweelo News Network
Hargeysa (ANN)- Mudanayaasha Golaha Wakiillada Somaliland, ayaa ansixiyey Xeerka Doorashooyinka Madaxtooyada iyo Golayaasha Deegaanka oo wax-ka-beddel iyo kaabis lagu sameeyey.
Xeerkan oo Komishanka Doorashooyinku u soo gudbiyey Golaha Wakiillada si la isu waafajiyo arrimo farsamo oo la xidhiidha doorashadan soo socota ee Madaxtooyada iyo kuwa deegaannada ee dambe, ayaa fadhi uu yeeshay aqalka Wakiilladu oo ay ka qaybgaleen 41 xildhibaan lagu ansixiyey cod aqlabiyad ah, kadib markii cod loo qaaday ay ogolaadeen 37 mudane, hal xildhibaana uu diiday, halka 3 kalena ka aamuseen.
Xildhibaan Cabdillaahi Xuseen Cige (Balaaki), ayaa markii fadhigu goluhu dhammaaday sharraxaad ka bixiyey qodobada isbeddelka lagu sameeyey Xeerka Doorashada Madaxtooyada iyo Deegaanka ee ay ansixiyeen, ayaa sheegay in ay jiraan arrimo farsamo aan hore ugu jirin xeerkan oo u baahday in la waafajiyo hadda, waxaannu yidhi, “Waxyaabaha la ansixiyey ee ku jira Xeerkani waa qaar dhinaca farsamada ah, tusaale ahaan doorashadii hore ee Madaxtooyada waxaynu ku galnay diiwaangelin la’aan, tan iminka soo socotana diiwaangelin baynu ku galaynaa, markaa si xeerkii la isu waafajiyo waa in wax-ka-beddel iyo kaabis lagu sameeyaa, waxa kaloo ku jira qodob u fasaxaya Madaxweynaha iyo Madaxweyne-ku-xigeenka la dooranayo, shaqaalaha iyo ciidammada ka shaqaynaya doorashada inay ka codayn karaan goobo aanay ka diiwaangashanayn, maadaama xeerku markii hore dhigayey in qof waliba halka uu iska diiwaangeliyey uun inuu ka codeeyo.”
Sidoo kale, Xildhibaan Baar Siciid oo ka tirsan Golaha Wakiillada, ayaa iyaduna sheegtay in ay ansixiyeen wax-ka-beddel aan badnayd oo lagu sameeyey xeerka Doorashooyinka oo laga dhigay lifaaqan lagu kaabay.
