Araweelo News Network
Hargeysa (ANN)-Mr. Ismaaciil Hure Buubaa oo ka mid ah masuuliyiinta xisbiga mucaaridka ah ee WADDANI, ayaa sheegay in ku biiristooda xisbigaasi ay beddeli doonto khariidada siyaasadeed ee dalka Jamhuuriyadda Somaliland.
Mr. Ismaaciil Buubaa oo hadal ka jeediyey xaflad xisbiga WADDANI u sameeyey taageerayaal haween ah oo ku biiray, kana soo jeeda degaannada koonfurta Hargeysa, waxa uu tilmaamay inay ka shaqayn doonaan sidii wax-garadka reer Somaliland oo dhan ugu biiri lahaayeen WADDANI.
“Way caddaatay arrin aannu hore u sheegnay in ku biiristii aannu ku biirnay WADDANI ay noqonayso mid beddela khariidada siyaasadeed ee Somaliland…shaqaduna waa bilaw, geeddiguna wuu socon doonaa, waxaynanu ka shaqayn doonaa dumarka Somaliland oo dhan inay isugu yimaadaan WADDANI, dhallinyarada iyo wax-garadka Somaliland oo dhan inay isugu yimaadaan WADDANI,” ayuu yidhi siyaasiga Ismaaciil Buubaa.
Waxa kaloo uu ka hadlay inay doonayaan sidii ay Somaliland uga badbaadin lahaayeen boobka iyo dhaca hantida ummadda.
“Somaliland waxay u baahan tahay badbaad, waxayna u baahan tahay boobka iyo dhaca lagu wado in laga badbaadiyo iyo been aan dhammaanayn oo xisbiga KULMIYE ku shaqaysanayey, waqtigaasina wuu dhammaaday, khariidada siyaasadeed ee Somaliland way is beddelaysaa, mana doonayo in aan arrinta ku sii dheeraado, waqtiguna wuu is gurayaa,” ayuu yidhi Siyaasiga Ismaaciil Hure Buubaa oo ka mid ah masuuliyiinta xisbiga mucaaridka ah ee WADDANI.