Araweelo News Network
Hargeysa (ANN) Waqtiga uu qabsoomayo shirka Golaha Dhexe ee xisbiga mucaaridka ah ee WADDANI, ayaa si rasmi ah loogu dhawaaqay, iyadoo shirkaas lagu dooran doono murrashaxiinta jagooyinka Madaxweynaha iyo Madaxweyne-ku-xigeenka uga qaybgeli doona doorashada Madaxtooyada ee u muddaysan inay ka qabsoonto Somaliland bisha March ee sannadka 2017, haddii Ilaahay yidhaa.
Xoghayaha Golaha Dhexe ee WADDANI oo saxaafadda la hadlay shalay, ayaa sheegay in Golaha Fulintu ay go’aamiyeen in shirku ka qabsoomo caasimadda Hargeysa bisha October 2016.
“Waxa aannu doonaynaa in aannu iclaaminno shirkii Golaha Dhexe ee xisbiga WADDANI, kaasoo qabsoomi doona 1 ilaa 2 bisha October 2016, haddii Ilaahay yidhaa, waqtigaas oo ah maalin Sabti ah iyo maalin Axad ah.
Waxa aannu dhammaan xubnaha Golaha Dhexe ogaysiinaynaa ee jooga gudaha waddanka amma dalka dibaddiisa inay ilaaliyaan waqtigaas oo ay go’aamiyeen Golaha Fulinta ee xisbiga WADDANI oo iyagu xaq u leh cayimista waqtiga uu qabsoomayo shirka Golaha Dhexe.
Shirka Golaha Dhexe waxa lagu ansixin doonaa heshiisyada xisbigu galo, waxaanna lagu dooran doonaa murrashaxiinta Madaxweynaha iyo Madaxweyne-ku-xigeenka ee xisbiga WADDANI,” ayuu yidhi Xoghayaha Golaha Dhexe ee WADDANI.
