Araweelo News Network
Cabbitaanka kulul ee ay ka mid yihiin shaaha, kafeega iyo dhir-dhaqameedka la isku daweeyo ee la karkariyo, ayaa la ogaaday inay sababaan kansarka ku dhaca cunaha (Oesophagus Cancer), sida ay shaacisay Hay’adda Qarammada Midoobay u qaabilsan Cudurka Kansarka ee loo soo gaabiyo UN’s Cancer Agency.
Waxa hore shaki looga qabay in kafeega kulul iyo dhirta dawo-dhaqameed ahaanta loo adeegsado ay yihiin kuwa sababa cudurka kansarka, sidaa darteedna heer-kul dhexdhexaad ah lagu cabbo, balse waxa arrintaas xaqiijiyey xogta Qarammada Midoobay soo saartay.
“Natiijadani waxay dibadda soo dhigtay in cabbitaanka kulul yahay waxyaabaha keena kansarka cunaha ku dhaca, iyadoo taasna ay ugu wacan tahay heer-kulka aadka u badan oo aan cunuhu xamili Karin.” Sidaa waxa yidhi Christopher Wild oo ah Agaasimaha Hay’adda Caalamiga ah ee Cilmi-baadhista Kansarka ee IARC (International for Research on Cancer).
Hore waxa arrintan looga soo saaray daraasado badan oo la isku khilaafay, kuwaasoo badankoodu sheegay in cabbitaannada aadka u kulul dhaawacaan hunguriga amma dhuunta cuntada iyo hawaduba galaan ee dadka, taasina aakhirka keento kansarka cunaha ku dhaca, waana arrinta waqtigan Qarammada Midoobay xaqiijisay.